منام عن مريضة سرطان

مرحبا ماما نجية جمعة مباركة ويا رب تكوني بأحسن حال

اليوم شفت منام قبل الظهر
المنام غريب ويا رب خير

بشوف اني رايحة عالجامع لأحفظ قرآن
بشوف بنات وصبايا قاعدين على كراسي ونسوان
وبينهن كم صبية محجبين شبه بعض شقرا وحلوين
بعرف قرايب أو أخوات أعمارهن فوق ال15 وبين العشرينات
المهم بقعد جنب بنت ما بتكون محجبة بس بشوف شعرها قصير كتيير يا دوب 2 سم وأشقر
وبحس وجها تعبان بعرف مريضة سرطان وحتى عينها فيها شي
المهم البنت بتحكي معي بتقلي ليش جاية لهون
بقلها لأحفظ ( مع العلم انا حفظت القرآن بس عندي نية روح لأتعلم التجويد)
بتقلي هي نحنا كنا عند الدكتور وبتصير بتحكي معي كتير
بتقلي شفنا ناس غريبة عندو ومقرفة عملوا هيك وهيك (نسيت بالضبط شو عملوا)
وتقلي حتى باسل قرف (قصدها أخو شيريهان) انا بفكر باسل كان معهن يعني يقربوه ويقربوا شيريهان!
وبشوف ايدها بلاقي عندها أصابع أكتر عددهن 6 وهي تقلي نحنا المرضى عنا 3 اصابع زيادة بأيدنا
وتكون لابسة بأيد تانية كف تأشر عليها وتقلي وهون عندي اصبعين لاصقين ببعض وكمان شي تاني (نسيت شو هو)
وبشوف كمان الها اخت لابسة كف متلها
وانا بزعل عليهن وبس هيك

(وما بعرف لو شيريهان لها علاقة بالمنام بس بالواقع هي حاليا مضغوطة قريبتها مريضة كتير ووضعها صعب )

وشفت منام قبل مو متذكرة كل تفاصيلو
بس بشوف بدها تصير حفلة ببيت ستي ابتسام
وبشوف العيلة مجتمعة ولسا ما صارت الحفلة بس بدها تصير
بشوف بنت خالتي عليا وبنت خالي بيان
بشوفهن لابسين فساتين طويلة ومزبطين جالهن شعرهن وهيك وانا بكون لابسة فستان بس يمكن مو طويل كتير ويمكن لونو وردي
بفوت معهن عالصالون يكون مجهز للحفلة
وتصير عليا وبيان يرقصوا متل المجانين
انا ما بحب رقصهن مو رقص حلو وبس جنان
فبضل واقفة ع جنب بدون ما ارقص بس بتطلع عليهن وبعدين بطلع
المنام له تكملة بس ما عم اتذكر وما بعرف لمين الحفلة بس تنذكر شي عن خطبة وشي لي بس مو فاكرة
وبشوف خالتي بسمات وخالي حامد ومومتذكرة الباقي بس

وانا بنت 20 سنة
بيان وعليا 22 مو مخطوبين
وربي يجزيكِ الخير