يارب خير اللهم صلى و سلم و بارك على سيدنا محمد

قبل ما احكى لحضرتك الحلم انا كان فى واحد كنا اصدقاء ف الجامعه و بعد كده قربنا من بعض و كان ف موضوع خطوبه بس متمش بعدها رجعنا نتكلم تانى عشان احنا اساسا اصدقاء بس انا بقالى اسبوع مش بكلمه و متخانقه معاه طبعا بدعى ربنا كل يوم اننا نرجع نتكلم و ان ربنا يهديه و نرجع و يكون نصيبى و نتخطب اسفه انى طولت عليكى

حلمت ان انا و بنات كانوا معايا ف الجامعه كنا ف رحله و كان ف رمل و بحر و المفروض ان هو كان جى بس اتأخر المهم ف الاخر شوفته جى من بعيد بس كان باصص ف الارض و شكله مضايق و انا ف الحلم بردو قولت جوه نفسى انا هضحك و هزر مع البنات عادى و مش هكلمه بعد كده الحلم اتقلب انى نايمه على الكنبه ف شقتنا و حد رن على موبايلى كان اسمه ف كلمه بسبوسه فالموبايل كان مع ماما قالتلى مين ده قولتلها مش عارفه روحت رديت عليه فهمت انه محل اكل و ان محمد كلمه من موبايلى و طلب وجبات اكل عشان الرحله اللى كنا فيها محمد ده الولد اللى حكتلك عليه فأنا قولت للراجل انا معرفش حاجه هخلى اخويا يكلمك عشان مكنتش عارفه اقول للراجل اللى كلمك من موبايلى ده يقربلى ايه قفلت معاه و قولت لماما انا هكلم محمد عشان اقوله على اللى حصل بعد كده الحلم اتقلب ان انا و محمد واقفين ف المطبخ و بنحضر وجبات الاكل و هو عملى طبق كله كفته مشويه و كأن يوم الرحله خلص و جه تانى يوم كنا اعدين ف مطعم انا و هو على ضوء الشموع و خلاص اتصلحنا و هو كان عمال يقولى ان شكلى حلو اوى الترابيزه كان عليها ثلاث شموع من غير قصد وقع عليا شمعه لسعتنى و نفس اللحظه عملت تعويره فيها صديد هو اتخض جامد و قالى غصب عنى قولتله عادى ولا يهمك قالى لا لازم اتصرف و راح خدنى جرى على حمام المطعم الرجالى و راح جابلى كريم اول ما حطه على ايدى التعويره اختفت تماما يمكن شكل جلدى ف الحته دى بقى احلى من باقى ايدى بعد كده خرجنا و كنا ماسكين ايد بعض كان ف سلم كهربا و جمبه سلم عادى انا اصلا ف الواقع بخاف من السلم الكهربا فهو مسك ايدى جامد عشان يشجعنى ننزل على السلم الكهربا بس انا خوفت و قولتله لا بلاش انا هنزل على السلم العادى راح قالى بس احنا ف ال ١١ قولتله عادى راح نزل هو على السلم الكهربا و انا على السلم العادى و كده كده هنتقابل تحت و انا نازله على السلم السلم كان كبير اوى بس نضيف جدا روحت قولت انزل و انا اعده على السلم واحده واحده بس مكنتش تعبانه و كان ف اغنيه رومانسيه شغاله قولت كويس هى مدتها خمس دقائق اسمعها لحد ما انزل
انا انسه ملتزمه الحمد لله