منام عن عم أمي

مرحبا ماما نجية يا رب تكوني بخير
شفت منام اليوم قبل صلاة الظهر يوم الجمعة
المنام غريب شوي وان شاء الله خير

بشوف انو نحنا معزومين ع بيت عم أمي
اسمو هشام (مع العلم بالواقع ما شفتو بحياتي)
يكون في نسوان وقرايب وهيك كأنها حفلة أو جمعة

المهم بكون مع وحدة من قرايبي يمكن بنت حالي بيان
يكون عمها لماما ايجا نشوفو نسلم عليه ويدخل ع غرفة تانية

بعدين بشوف قاعدين بغرفة مو كبيرة كتير بس حلوة واثاثها حلو (هو البيت بالمنام كبير وحلو)
يكو في خالتي بسمات وبناتها وأمي وأختي وقرايب كمان
بكون لابسة أنا برجلي كندرة سوودة وبني حلوة عندي ياها ووكعبها طوله شي 9 سم
بعدين بشوف جايبة معي جزمة وكندرة بيضا كعبها مو عالي كتير (كمان عندي ياهن بالواقع)
بشوف بعدين اني لابسة البيضا بس كأنها صارت صندل مفتوح وكعبها عالي 12 سم أو أكتر وحلوة كتييير كتير
وبصير أطول من الكل بسببها يعني بسلم على بنات خالتي بطلع أطول منهن عدا وحدة طويلة بطلع بطولها تقريبا
وهني كأنهن متفاجئين أو هيك شي وتقلي بنت خالتي عليا (وهي انسة) انو كعبك عالي أو ليش وهيك
بقلها عادي مو انتي لابسة كعب كمان!
وهي تكون لابسة كعب بس مو عالي كتير (وهي أصلاً أطول مني بمنيح)

بعدين يقولوا أنو عمو هشام حيفوت
فأنا بجي بسرعة بدي اغير الصندل الأبيض وألبس جزمة بنية غامقة كعبها عالي بس هي مو عالية فوق الكعب بشوي وهي شاموا والها فروة مفهدة حلوة وأفتح (وعندي ياها بالواقع)
بجي بلبس أول فردة وبشلح التانية بلاقي عمو فات فبوقف وانا لابسة برجل وشالحة برجل
نجي نصافحو يضحك هو ويقلنا لازم ما توقفوا حتى اقرب منكن
يرجع يعيد يقرب ونوقف ونصافحو (يعني يكون مرح وطيب)

بجي برجع بقعد ع جنب لكمل لبس الجزمة
وعمو يطلب عشا النا
فيجيبوا صحون كبيرة فيها فطايرة بس فاخرة ومرتبة وهيك
يجيب صحنين أو تلاتة كبار يمكن ويحطوهن عالطاولة (الطاولة بالنص بين الكل

وانا بكون مرتبكة وملتهية بالجزمة بلبسها
بجي بخلص بلاقي الصحون فضيت ما بقي الا قطعتين
بجي بدي لحق اخد صحن صغير لاكل فيه ما بلاقي
تقول امي ما اكلتي انتي؟ بقلها خلص مو مشكلة
مع اني بنقهر من جواتي بس بستحي وبرجع بقعد
بقول لاختي ماسة ايمتى لحقوا يخلصوهن خلال 5 دقائق ولا عشرة"؟!
تقلي اي بعشر دقايق خلصوا
ويعني السبب بطئي وبرادة قلبي وهيك
بس بعدين يجيبوا صحون حلو كبيرة كمان حلو عربي رقايق وقشطة
وباكل قطعتين فورا


بالمنام بشوف كمان امرأة بعرفها هي كنة عم ماما التاني مش هشام
تحكي معي وهيك وهي مرت عامر ، بعدين بشوف عروس لابسة فستان أبيض وحاطة طرحة
تجي وحدة تقول لبنت صغيرة انت حضرتي عرس هاي؟!
انا بفكر العروس مرت عامر بقلها لا انا حضرت عرسها وانا وصغيرة
بشوف وجه العروس بلاقي غيرها بقلها لا عفوا مو هي وحدة تانية

وبس
وبالواقع يا ماما عمو هشام ما بعرفو وما شفتو بحياتي
وهو كبير بالعمر وصحته تعبانة شوي
بس بالمنام بشوف صحته منيحة ورجولي وضهرو مشدود وهيك ولابس بدلة
حتى شكلو اسمر شوي وشعرو أبيض وأسود غالبو الشيب وجسمو حلو وبشوفو عمرو بالخمسينات تقريبا
هو بالواقع بآخر السبعينات ووصفتو لماما قالتلي هيك شكلو بالواقع كان بس هلأ كبر
وبالمنام بشوف وضعو كتيييير منيح وهيك بس بالواقع وضعو لمادي عادي جداً

وبس هيك يا ماما
بالنسبة للكنادر ما بعرف بس كنتي تقوليلي كلما شوف 3 كنادر 3 عرسان حيتقدموا والتالت يصير نصيب
هو فعلا اتقدم 2 والتالت اتقدم بس لسا ما صار طلب، وم بعرف لو محسوب التالت أو لا
فطمنيني وانا بنت 20 سنة وربي يجزيكِ الخير